“Ներսես Խառատյանը, կարեւորում է հատկապես սահմանամերձ համայնքում ապրող ու աշխատող մասնագետների համար մասնագիտական հմտությունները զարգացնելու հարցը”
Օրերս, Երեւանի պետական համալսարանի մանկավարժության եւ կրթության զարգացման կենտրոնի մագիստրատուրայի շրջանավարտներին հանդիսավորությամբ հանձնվեցին դիպլոմներ։ «Ուսուցչական առաջնորդություն» մագիստրոսական կրթական ծրագիրը գերազանցության դիպլոմով ավարտեց նաեւ «Հանուն Ազատության» ԻՀԿ-ի խորհրդի անդամ, Սյունիքի մարզի Ծավի միջնակարգ դպրոցի ուսուցիչ Ներսես Խառատյանը։
«Մենք բոլորս այստեղ ենք, որովհետեւ ինչ-որ մի օր մեզ հավատացին ու վստահեցին, որ մենք ի զորու ենք ոչ միայն դառնալ ուսուցիչներ, այլեւ Ուսուցիչ-առաջնորդներ»,-իր ավարտաճառում նշեց Ներսես Խառատյանը։
«Ուսուցչական առաջնորդություն» մագիստրոսական կրթական ծրագիրը համատեղ ստեղծել են ԵՊՀ-ն եւ «Դասավանդի՛ր, Հայաստան» հիմնադրամը։ Ծրագիրը նպատակ ունի հավասար կրթության հնարավորություն ստեղծել Հայաստանում՝ բոլոր երեխաների համար՝ անկախ բնակության վայրից։
Ներսես Խառատյանը, կարեւորում է հատկապես սահմանամերձ համայնքում ապրող ու աշխատող մասնագետների համար մասնագիտական հմտությունները զարգացնելու հարցը, ինչի հնարավորությունը ստեղծել են ԵՊՀ-ն ու «Դասավանդի՛ր, Հայաստան»-ը համատեղ։
«Ծրագիրը հնարավորություն տվեց ակադեմիական գիտելիքներ, համակարգային մտածողություն ձեռքբերել, այդ գիտելիքներն ու մտածողությունը համադրել փորձի հետ, առավել արժեւորել ուսուցիչ-առաջնորդ լինելու առաքելությունը»,- «Այսօր» լրատվականի հետ զրույցում նշել է Ներսեսը։
Մագիստրոսական այս ծրագիրը հնարավորություն է տալիս մարզերում աշխատանքը դարձնել գրավիչ, լուծել մարզերի դպրոցների ուսուցիչների թափուր հաստիքների խնդիրը, ինչպես նաեւ ծրագիրը ստեղծում է կրթության հավասարության հնարավորություն, որպեսզի Հայաստանում ծնված յուրաքանչյուր երեխա իրացնի հավասար կրթության իրավունքը։
«Հանուն Ազատության» ԻՀԿ-ն սրտանց շնորհավորում է Ներսեսին՝ մաղթում նորանոր հաջողություններ եւ առաջարկում դիտել Aysor.am-ի հետ Ներսես Խառատյանի հետ հարցազրույցը։
Թողնել մեկնաբանություն